A Oficina Nacional de Emprendemento (ONE) é unha iniciativa do Goberno de España no marco da estratexia de España Nación Emprendedora, e cuxa implantación articúlase na Lei 28/2022, do 21 de decembro, de fomento do ecosistema das empresas emerxentes. Esta lei, máis coñecida como “lei de startups”, prevé que a Administración Xeral do Estado debe poñer en marcha un portal web con información para impulsar as funcións de promoción do ecosistema español. Neste contexto, e financiado polo Plan de Recuperación, Transformación e Resiliencia, a través dos fondos Next Generation EU, nace a Plataforma ONE, que pretende converterse no punto virtual de encontro e colaboración entre todos os axentes implicados no emprendemento en España: startups, talento innovador, entidades públicas, asociacións, centros de formación, investidores e profesionais, entre outros. Esta iniciativa foi posta en marcha por Red.es, entidade adscrita ao Ministerio para a Transformación Dixital e Servizo Público, a través da Secretaría de Estado de Dixitalización e Intelixencia Artificial. A web one.gob.es, que foi presentada o pasado 27 de febreiro, conta con funcións pensadas especificamente para os diferentes axentes do ecosistema emprendedor, promovendo a colaboración e o intercambio de coñecemento, fomentando o emprendemento innovador e xerando información relevante sobre o sector. A Plataforma ONE ofrece todos os coñecementos necesarios para emprendedores e aqueles que queiran iniciar os seus proxectos en España. Para poder aproveitar os servizos da plataforma é necesario rexistrarse. O proceso apenas require dous minutos e permite formar parte do principal punto de encontro virtual do emprendemento innovador en España, tendo acceso a servizos e información.