O Consello de Ministros aprobou a modificación de catro reais decretos que regulan as subvencións turísticas no marco do Plan de Recuperación, Transformación e Resiliencia. O obxectivo é flexibilizar os requisitos para contribuír a unha maior e mellor consecución dos fins que perseguen as subvencións.

En concreto, modifícase o Real decreto 1074/2021, do 7 de decembro; 1118/2021, do 21 de decembro; 449/2022, do 14 de xuño, e 1011/2022, do 5 de decembro.

As modificacións afectan a medidas de fomento da resiliencia turística en Baleares, Canarias, Ceuta e Melilla. En concreto, amplíase o prazo de execución das actuacións ata o 30 de xuño de 2025. Así mesmo, increméntase ata o 100 % a porcentaxe de posible subcontratación das actuacións financiadas.

Así mesmo, flexibilízase o réxime de modificación dos convenios nos que se recolle o detalle das actuacións financiables, co fin de permitir unha mellor adaptación da oferta de axudas á realidade da demanda destas por parte dos potenciais beneficiarios.

En canto ás subvencións destinadas ao financiamento de proxectos sostibles de mantemento e rehabilitación do patrimonio histórico de uso turístico , o RD aprobado hoxe permitirá a modificación do contido da resolución de concesión da subvención, a posibilidade de subcontratar ata o 100% e a prórroga do prazo de execución das axudas ata o 30 de xuño de 2026. Esta modificación afecta a proxectos presentados por cidades Patrimonio da Humanidade, entre outros destinos.