España presentou ante a Comisión Europea (CE) a sexta e penúltima solicitude de pago do Plan de Recuperación, Transformación e Resiliencia (PRTR), vinculada ao cumprimento de 78 fitos e obxectivos, dos cales 69 están asociados a transferencias e 9 a préstamos. O importe total ascende a 7.256 M€, dos que 6.205 M€ corresponden a transferencias e 1.051 M€ a préstamos. Unha vez que a solicitude sexa validada pola Comisión Europea, España terá recibido 60.511 M€ en transferencias e 17.283 M€ en préstamos, cun total de 343 fitos cumpridos, arredor do 70% do previsto.

Co presente desembolso, España alcanzaría o 75% dos fondos asignados no Mecanismo de Recuperación e Resiliencia (MRR). Quedan pendentes por solicitar arredor de 25.000 millóns de euros, que forman parte do tramo final previsto para o peche do Plan. España conta ata o 31/08/2026 para executar as reformas e investimentos pendentes (fitos e obxectivos cumpridos) e ata o 30/09/2026 para presentar a última solicitude de pagamento á CE. Pola súa banda, a CE dispón ata o 31/12/2026 para efectuar os últimos pagamentos, quedando así o MRR pechado.

A solicitude incorpora reformas de calado lexislativo e investimentos estratéxicos xa en marcha. Entre elas destacan:

• Mobilidade sostible e descarbonización, coa aprobación da Lei de Mobilidade Sostible, o impulso ao despezamento de vehículos antigos, a adquisición de vehículos de emisións cero e a execución de 85 proxectos de electromobilidade.
• Dereito á vivenda, coa creación de CASA47, a nova Entidade Estatal de Vivenda e Solo, que consolida un sistema público estable de vivenda accesible.
• Protección social e sistema sanitario, coa transposición da Directiva (UE) 2019/1158, que amplía e retribúe permisos de nacemento e coidado, e con medidas para mellorar as condicións do persoal sanitario en zonas de difícil cobertura.
• Transformación industrial e dixital, con 2.242 M€ executados a través dos PERTE, máis de 1.800 M€ en dixitalización e ciberseguridade, e avances en conectividade e 5G.
• Nova Axencia de Avaliación de Políticas Públicas, dedicada a reforzar a rendición de contas e a avaliación sistemática de programas públicos.

A solicitude incorpora tamén a petición de pagamento dos fondos retidos en relación co fito 167 (dixitalización das entidades rexionais e locais) e nova documentación sobre o fito 388, relativo aos ingresos fiscais, que España xa supera segundo os datos de recadación de 2025.

Segundo o Goberno, a verificación dos 78 fitos que se inclúen na 6ª solicitude de pago requiriu a achega de máis de 1,7 millóns de documentos e a participación de arredor de 3.700 responsables públicos. O proceso implicou 2.538 responsables do ámbito local, 602 das comunidades autónomas, 214 do ámbito universitario e 279 da Administración Xeral do Estado.