O Ministerio de Industria e Turismo e as comunidades autónomas acordaron, no marco da Conferencia Sectorial de Turismo, a distribución territorial de 183 millóns de euros do Plan de Recuperación en axudas a plans de sustentabilidade social, eficiencia enerxética e formación en competencias dixitais do sector turístico. No primeiro dos acordos adoptados, a Conferencia Sectorial aprobou a distribución territorial de 119 millóns de euros do Plan de Recuperación, Transformación e Resiliencia (compoñente 14) para financiar proxectos de eficiencia enerxética de empresas turísticas (denominada oficialmente Liña de Financiamento para Proxectos de Eficiencia Enerxética e Economía Circular de Empresas Turísticas). Dentro desta liña, que conta cun orzamento de 119,6 millóns de euros, a Galicia correspóndelle 5,49 millóns de euros do reparto de fondos. Ademais, acordouse a distribución dun segundo paquete de fondos europeos de máis de 10 millóns de euros para investimentos para os Plans de Sostibilidade Social Turística (Compoñente 14 do Plan de Recuperación). A Galicia correspóndelle 462.986 euros do reparto total dos fondos. Finalmente, estableceuse a repartición de 54 millóns de axudas do Plan de Competencias Dixitais en Turismo (Compoñente 19 do Plan de Recuperación). Dentro desta liña, a Galicia correspóndelle un importe de 2,49 millóns de euros.