O ministro de Industria e Turismo, Jordi Hereu, presidiu en Madrid, xunto á secretaria de Estado de Industria, Rebeca Torró, e Luis Ángel Colunga, comisario especial do PERTE de Descarbonización Industrial, a reunión da Alianza para a Descarbonización da Industria Española, onde se presentou a primeira convocatoria da liña 1 deste PERTE, co obxectivo de seguir traballando por unha industria española sostible, resiliente, moderna e respectuosa co medio ambiente.

O PERTE de Descarbonización Industrial prevé, no seu conxunto, un investimento público de 3.170 millóns de euros, mobilizando un investimento total de ata 11.800 millóns e a creación duns 8.000 postos de traballo de calidade. A súa aplicación suporá reducir 13 millóns de toneladas de CO2 á atmosfera ao ano. A primeira convocatoria da liña 1 deste PERTE está dotada con 500 millóns de euros en préstamos e outros 500 millóns en subvencións. A apertura do prazo de presentación de solicitudes comezará o 24 de xaneiro de 2024 e rematará o 17 de abril de 2024. O ministro anunciou que ao longo do segundo semestre de 2024 está prevista unha segunda convocatoria desta liña 1, cuxos proxectos poderán executarase máis aló do ano 2026. Tamén indicou que se está a traballar na liña 4 de PERTE, vinculada ao desenvolvemento de novas instalacións de fabricación altamente eficientes e descarbonizadas.