Luis Planas indicou que a elaboración da Estratexia Nacional Alimentaria vai ser unha das prioridades do Goberno na nova lexislatura e que, dada a súa importancia, espera contar coa achega e participación de todos os axentes implicados no sector. O ministro mantivo un encontro con representantes da Federación Española de Industrias de Alimentos e Bebidas (FIAB), aos que solicitou que lles expoñan as súas propostas para colaborar na definición das liñas a seguir. “É moi importante coñecer os puntos de vista da industria agroalimentaria para articular esta estratexia”, subliñou. O ministro anunciou que o Goberno convocará proximamente unha segunda convocatoria do Proxecto Estratéxico de Recuperación e Transformación Económica Agroalimentaria (PERTE) para apoiar proxectos que contribúan ao fortalecemento da industria deste sector, no que se empregará o remanente dos fondos dispoñibles. Explicou que a vontade do Goberno é que non se perda nin un euro na posta en marcha dos fondos Next Generation da Unión Europea, polo que se pretende que esta segunda convocatoria chegue a un maior número de empresas que acometen proxectos de dixitalización e a sustentabilidade, que son os dous eixos do PERTE Agroalimentario que xestiona o Ministerio de Industria e Turismo, coa colaboración do Ministerio de Agricultura, Pesca e Alimentación. A primeira convocatoria deste plan resolveuse o pasado 19 de decembro coa adxudicación de 183,6 millóns de euros para financiar 292 proxectos presentados por 233 empresas. Destes proxectos, hai un proxecto tractor íntegramente galego liderado polo GRUPO LENCE que obtivo un total de 9,7 millóns de euros (5% do total concedido).