A nova convocatoria do Plan Integral de Fomento da Economía Social lanzada en xaneiro polo Ministerio de Traballo e Economía Social contou coa participación de máis de 400 proxectos presentados por un importe superior aos 100 millóns de euros. O Plan Integral de Fomento da Economía Social, que se enmarca no Proxecto Estratéxico de Recuperación e Transformación Económica (PERTE) da Economía Social e dos Coidados, pechou o pasado 12 de febreiro a convocatoria de proxectos que contribúan de forma innovadora a xerar e impulsar este modelo económico que xa representa arredor do 10% do PIB español. A convocatoria puxo 80 millóns de euros a disposición de entidades de economía social, como cooperativas, mutuas, sociedades laborais, empresas de inserción, centros especiais de emprego, cofradías de pescadores ou sociedades agrarias de transformación. O impulso que estas axudas poden supoñer ao sector propiciou unha gran diversidade de iniciativas cuxo orzamento total, incluída a súa parte de cofinanciamento, supera os 200 millóns de euros. As subvencións, que consisten nunha contía mínima de 10.000 euros e máxima de 3,5 millóns de euros por proxecto a executar antes de xuño de 2025 cun ámbito de actuación de polo menos dúas comunidades autónomas, dividíronse en cinco programas ( Transforma_ES, Iniciativa_ES, Impulsa_TEC, Alianzas_ES, Sostenibles_ES).