O Consello de Ministros aprobou o proxecto de Lei de Industria e Autonomía Estratéxica, que establece as bases para a ordenación do sector industrial e o marco da política industrial española, así como os criterios de coordinación entre as administracións públicas. Esta lei ten como obxectivo impulsar unha nova estratexia industrial para incrementar o peso da industria na economía española e o emprego, mellorar a súa competitividade e resiliencia, e facer posible a súa contribución aos obxectivos de descarbonización da economía e de transformación dixital.A nova lei consolida e reforza os instrumentos que permiten a participación da industria española no mercado interior europeo, mantendo entre os seus obxectivos a garantía e protección da liberdade de establecemento de empresas industriais, a protección da libre circulación de produtos industriais, a garantía da unidade de mercado e a coordinación administrativa, a promoción e control da seguridade e calidade industriais, e a regulación do réxime xeral de responsabilidade da actividade industrial.

Entre as principais novidades que esta propón, destacan as que a continuación se mencionan.

A nivel de obxectivos, tendo en conta a estratexia industrial europea, búscase:

• Planificar e promocionar unha maior autonomía estratéxica e crecemento da base industrial
• Fomentar o talento e a cultura industrial
• Impulsar ecosistemas, proxectos tractores e estratéxicos
• Fomentar o crecemento e a internacionalización da empresa industrial
• Consolidar un entorno favorable ao desenvolvemento de empresas industriais e á súa adaptación aos cambios estruturais, especialmente nas pemes.
• Fortalecemento institucional e o impulso da participación dos axentes sociais, o diálogo social e a negociación colectiva.
• Transformación dixital do sector industrial.
• A transformación cara a unha industria de cero emisións netas de aquí a 2050

A nivel de Gobernanza, a Lei prevé a creación dos seguintes elementos:

• Estratexia España da Industria e Autonomía Estratéxica, que conterá as liñas xerais e directrices básicas da política industrial.
• Plan Estatal de Industria e Autonomía Estratéxica, para o desenvolvemento e consecución dos obxectivos da estratexia. Cunha vixencia de tres anos, incluirá programas de mellora da competitividade industrial, dixitalización, innovación, entornos colaborativos, formación e autonomía estratéxica.
• Consello Estatal de Política Industrial (CEPI). Órgano consultivo que coordinará as accións da Administración Xeral do Estado (AGE) no desenvolvemento do Plan Estatal de Industria e Autonomía Estratéxica (PIAE).
• Conferencia Sectorial de Industria e PYME. Órgano de cooperación entre a AGE e as Comunidades Autónomas nos ámbitos regulados nesta lei.
• Foro de Alto Nivel da Industria Española. Órgano colexiado con autonomía funcional que asesorará ao Ministerio de Industria, Comercio e Turismo (MINTUR) no deseño das políticas do Goberno en materia de política industrial e autonomía estratéxica. A súa composición será mixta, integrada por representantes do MINTUR e dos axentes económicos e sociais do sector industrial de ámbito nacional.

 

Outras medidas

A Lei inclúe unha especial protección á industria intensiva en enerxía (eléctrica ou gas), con medidas de apoio que faciliten a descarbonización dos seus procesos e a súa transición enerxética. As instalacións industriais que se acollan a estas medidas deberán dispoñer dun plan de eficiencia enerxética e transición ecolóxica a longo prazo, que describa a senda de descarbonización da instalación.

Así mesmo, articularanse medidas de apoio aos Ecosistemas Industriais Estratéxicos, habilitando a posible concesión de axudas públicas sen concorrencia competitiva e grupos de traballo específicos de simplificación administrativa. Poderán recoñecerse novos Proxectos Estratéxicos para a Recuperación e Transformación Económica (PERTE) máis aló da vixencia do Plan de Recuperación, Transformación e Resiliencia (PRTR), que terán que estar enmarcados en polo menos un ecosistema industrial ou un reto identificado como estratéxico.

Ademais, a Lei pretende asegurar os investimentos realizados en España, regulando que calquera empresa que queira finalizar a súa actividade industrial no país deba anuncialo con nove meses de antelación ao Goberno e, no caso de ter recibido axudas públicas superiores a tres millóns de euros, teña que devolvelas se reduce en máis dun 65% a súa produción ou en 500 persoas ou máis o seu cadro de persoal.

Por último, créase a Reserva Estratéxica das Capacidades Nacionais de Produción Industrial (RECAPI), un fondo de produtos e capacidades estratéxicas susceptibles de mobilizarse con rapidez ante unha situación de crise. Non se trata tanto de ter produtos almacenados, como de dispoñer dun listado de artigos estratéxicos e de capacidades de produción nacional ante casos excepcionais de situacións críticas.

 

Transformación de SEPIDES

O Consello de Ministros tamén aprobou a transformación da Sociedade Mercantil Estatal SEPI Desenvolvemento (SEPIDES) na Sociedade Estatal de Promoción Industrial e Desenvolvemento Empresarial Entidade Pública Estatal. Esta entidade, cuxa titularidade corresponde a SEPI, actualmente está no ámbito do Ministerio de Industria e Turismo. SEPIDES xa conta cunha importante experiencia en materia de apoio ao sector industrial, entre outras actuacións, coa xestión do Fondo de Apoio ao Investimento Industrial Produtivo (FAIIP). Coa conversión de SEPIDES en Entidade Pública Empresarial (EPE), o Goberno dá un paso máis na súa aposta pola reindustrialización e a transformación, racionalizando e mellorando a eficiencia na xestión dos fondos dirixidos á promoción e o impulso da actividade industrial. SEPIDES xestionará as novas convocatorias dos PERTE financiadas cos fondos europeos da adenda, como a cuarta convocatoria do PERTE do Vehículo Eléctrico e Conectado, do PERTE Agroalimentario ou as novas convocatorias do PERTE de descarbonización industrial.