O Ministerio de Industria, Comercio e Turismo publicou este venres unha nova tanda de axudas definitivas a proxectos de produción de baterías de vehículos eléctricos e os seus compoñentes correspondentes ao PERTE VEC II. Deste xeito, autorízanse definitivamente 15 novos proxectos por valor de 190,4 millóns de euros. Con estas novas adxudicacións definitivas, o orzamento total asignado ascende a 528,7 millóns de euros de subvención, o que supón máis do 95% dos fondos europeos incluídos na convocatoria. A esta cantidade hai que sumar 100 millóns de euros de crédito. En conxunto, as axudas distribuíronse ata o momento a 26 proxectos de 21 empresas. Dos quince proxectos aprobados definitivamente nesta nova tanda destacan os seguintes: Stellantis, con 66,3 millóns de euros para catro proxectos, entre eles a factoría de Zaragoza, que recibe 55,9 millóns; Lotte, con 49,2 millóns de euros de subvención e Refinasol Battmat, con 15,7 millóns de euros. Ademais, a tecnoloxía de litio estremeña lévase 18,8 millóns de euros, Lithium Iberia consigue 13,3 millóns de euros e Mobis, 12,7 millóns. Dende o Ministerio traballan xa nunha terceira convocatoria do PERTE VEC, que sairá a principios de 2024 dotada con máis de 1.200 millóns de euros. Concedéronse un total de 8.219.702 euros a dous proxectos realizados en Galicia, o que supón o 1,31% do total concedido. Os dous proxectos en cuestión son, o liderado por STELLANTIS ESPAÑA S.L.: “Nueva línea de montaje y producción de baterías para vehículo eléctrico en la planta de producción de vehículos de Stellantis España en Vigo” que recibe unha axuda de 6.748.622 € e o proxecto: “Nuevas inversiones productivas enfocadas a la producción de componentes para la gestión térmica de baterías”  dirixida por BORGWARNER EMISSIONS SYSTEMS SPAIN, S.L., que recibe unha axuda de 1.471.080 €.