O Ministerio de Transportes e Mobilidade Sostible abriu unha consulta ás empresas públicas e privadas que desenvolvan unha actividade relacionada co transporte e as súas infraestruturas, para incorporar as necesidades do sector ás políticas e estratexias do Goberno encamiñadas a impulsar a modernización e descarbonización da mobilidade. O obxectivo da consulta é acadar un coñecemento detallado dos principais intereses e proxectos das empresas do sector centrados na transformación sostible e dixital do transporte de mercadorías e viaxeiros, a eficiencia enerxética e o fomento da intermodalidade, combinando estrada, ferrocarril e marítimo. A información e as conclusións obtidas servirán para que o Ministerio adapte as súas iniciativas para axudar ao sector a cumprir os obxectivos de redución de emisións e incremento de modos de transporte menos contaminantes. O prazo para participar comeza o 31 de xaneiro de 2024 e remata o 29 de febreiro de 2024. O formulario está dispoñible na páxina da sede electrónica do Ministerio. Esta consulta está aliñada cos obxectivos da Estratexia de Mobilidade Segura, Sostible e Conectada 2030, a iniciativa Mercancías 30 e cos principios do Plan de Recuperación, Transformación e Resiliencia. Así mesmo, enmárcase na Estratexia Europea de Mobilidade Sostible e Intelixente, que inclúe a ecoloxización do transporte de mercadorías mediante o fomento da intermodalidade.