O Ministerio de Transportes e Mobilidade Sostible concedeu provisionalmente 21,8 millóns de € en axudas a sete operadores ferroviarios privados para fomentar o transporte de mercadorías en tren. As subvencións están financiadas con fondos europeos Next Generation, e enmárcanse na segunda convocatoria de axudas do programa de eco-incentivos ferroviarios do Plan de Recuperación, Transformación e Resiliencia. Segundo a convocatoria publicada o 19 de xuño de 2023, cuxo prazo rematou o 1 de abril de 2024, o orzamento máximo establécese en 25.000.000 €. Seleccionáronse provisionalmente 7 entidades, sendo o importe total concedido 21.849.205 € (87,40% do total orzamentado). Non hai entidades galegas entre os beneficiarios.

Os sete operadores beneficiarios son: Captrain España, Continental Rail, Medway, CSP Logitren , CEFSA, Low Cost Rail e Go Transport Servicios. As cantidades adxudicadas oscilan entre os 11,1 millóns de € e os 37.000 € por empresa para o tráfico ferroviario realizado entre o 1 de xaneiro e o 31 de decembro de 2023. Neste período, os sete operadores transportaron un total de 4.053 toneladas netas por quilómetro en tráfico bonificado.